ЖК кыймылсыз мүлккө укуктарды каттоо чөйрөсүндөгү мыйзам долбоорун жактырды
Бүгүн, Жогорку Кеңештин жыйынында “Кыймылсыз мүлккө жана аны менен болгон бүтүмдөрдү укуктарды мамлекеттик каттоо жөнүндө” КРнын Мыйзамына өзгөртүүлөрдү киргизүү тууралуу” мыйзам долбоору биринчи окууда каралып, кабыл алынды.
Жыйында демилгечи депутат Дастан Бекешев аталган мыйзам долбоору кыймылсыз мүлккө байланыштуу көбөйүп жаткан алдамчылык аракеттерден жарандарды коргоо максатында иштелип чыкканын белгиледи.
“Кыймылсыз мүлккө карата каттоо аракеттерин жүргүзүүгө өз ыктыяры менен тыюу салуу механизмин киргизүү сунушталууда. Тагыраагы, мыйзам долбоору алдамчылык аракеттердин алдын алууга жана жарандарды, биринчи кезекте улгайган адамдарды үчүнчү жактардын мыйзамсыз аракеттеринен улам кыймылсыз мүлкүнөн ажырап калуудан коргоого багытталган”, – деди эл өкүлү.
Ошондой эле Дастан Бекешев мыйзам долбоорунда коюлган тыюуну алып салуу жөнүндө чечим 24 сааттан кийин күчүнө кирери каралганын кошумчалады. Муну менен катар жарандардын укуктарын кошумча коргоо максатында бул мөөнөттү 72 саатка чейин узартуу боюнча сунушту колдой турганын белгиледи.
Талкуу маалында депутаттар интернеттин жана заманбап техникалык каражаттардын кеңири жайылышы менен алдамчылык фактылары да көбөйүп жатканын жүйө келтирип, жарандарды алдамчылык схемалардан коргоо боюнча чараларды күчөтүү жана калк арасында түшүндүрүү иштерин жүргүзүү керектигин билдиришти.
