Ысык-Көлдө экологиялык мыйзам бузууларга 3 млн сомго жакын айып салынды
Ысык-Көл облусунда 1-июндан 1-августка чейин жаратылышты коргоо боюнча жүргүзүлгөн рейддердин жыйынтыгында 185 административдик протокол түзүлүп, 2 млн 94 миң сом өлчөмүндө айып салынды.
Жаратылыш ресурстары, экология жана техникалык көзөмөл министрлигинин басма сөз кызматынын маалыматына ылайык, эс алуу жайлары, туристтик объектилер жана башка чарбалык ишмердүүлүк жүргүзүлгөн аймактар көзөмөлгө алынды.
Мындан тышкары, пландан тышкаркы текшерүүлөрдүн жыйынтыгында 57 административдик протокол түзүлүп, 818 миң сом өлчөмүндө айып пул өндүрүлдү.
Балык ресурстарын коргоо бөлүмүнүн кызматкерлери тарабынан дагы 17 административдик протокол түзүлүп, 17 миң сом айып салынган. Ошондой эле суу биологиялык ресурстарына келтирилген зыяндын ордун толтуруу үчүн 4 миң 40 сом өлчөмүндө доо коюлган.
