Көк-Арттагы эс алуу жайларына 15 миң 500 сом айып салынды
Көк-Арт өрөөнүндө өткөн экологиялык рейдде 8 эс алуу жайына эскертүү каттары тапшырылды. Бул тууралуу Жаратылыш ресурстары, экология жана техникалык көзөмөл министрлигинин басма сөз кызматы билдирди.
Маалыматка ылайык, өрөөндөгү эс алуу жайларында саркынды суулардын айлана-чөйрөгө агызууга, тиричилик калдыктарынын туш келди таштоого жол бербөө боюнча текшерүү жүргүзүлгөн.
Натыйжада "Бай Кут" эс алуу жайында тиричилик калдыктарын белгиленбеген жерге таштоо фактысы аныкталып, мыйзам бузган жаранга 5 500 сом айып пул салынды.
Ал эми "Нур Ордо" эс алуу жайында саркынды суулардын жердин үстүнө агып чыккандыгы үчүн ээсине 10 миң сом өлчөмүндө административдик чара көрүлдү.
Экологиялык жана техникалык көзөмөл кызматы айлана-чөйрөнү коргоо жана мыйзам бузуулардын алдын алуу багытындагы рейддик иш-чараларды мындан ары да улантарын билдирди.
