Ат-Башыда эс алуучу жайдан илбирс жана күрөң аюунун терилери табылды
Ат-Башы районундагы жеке жаранга таандык эс алуучу жайдан Кызыл китепке кирген илбирс менен күрөң аюунун терилери табылды. Бул тууралуу Жаратылыш ресурстары министрлигинин басма сөз кызматы билдирди.
Маалыматка ылайык, Экологиялык жана техникалык көзөмөл кызматынын тескөөчүлөрү текшерүү учурунда аталган фактты аныкташкан.
Эс алуучу жайдын ээси терилер болжол менен 30 жыл мурда алынганын билдирген. Бирок алардын мыйзамдуу жол менен алынганын тастыктаган уруксат берүүчү документтерди көрсөтө алган эмес. Ошондой эле текшерүүнүн жыйынтыгы боюнча түзүлгөн документтерге кол коюудан баш тарткан.
Факт боюнча тиешелүү иш кагаздар түзүлүп, бардык материалдар чогултулууда. Жыйналган документтер мыйзам чегинде баа берүү үчүн укук коргоо органдарына өткөрүлүп берилери айтылды.
Мыйзамга ылайык, илбирске келтирилген зыян үчүн 2 миллион сомго чейин, ал эми күрөң аюуга келтирилген зыян үчүн 1,5 миллион сомго чейин доо каралган.
