Таш-Көмүрдө 125 жаран коомдук иштерге катышып, эмгеги үчүн акы алды
Таш-Көмүр шаарында БУУнун Дүйнөлүк азык-түлүк программасынын алкагында "Акы төлөнүүчү коомдук иштер" долбоору боюнча сегиз демилге ишке ашырылды.
"Өнүктүрүү демилгелеринин агенттиги" уюмунан билдиришкендей, долбоорго жумушсуз катары каттоодо турган 125 жаран катышып, шаардык инфраструктураны жана коомдук мейкиндиктерди жакшыртууга багытталган иштерди аткарышты.
Катышуучулар мектептерде жана мектепке чейинки билим берүү мекемелеринде оңдоо иштерин жүргүзүп, санитардык-турмуштук шарттарды жакшыртууга, ошондой эле шаарды көрктөндүрүүгө салым кошушту.
Маалыматка ылайык, долбоор жумушсуз жарандарга убактылуу иш менен камсыз болууга жана ошол эле учурда шаардык чөйрөнү жакшыртууга мүмкүнчүлүк түздү.
Аткарган эмгеги үчүн долбоордун ар бир катышуучусуна 300 килограмм ун, 30 литр өсүмдүк майы жана 1800 сом акчалай төлөм берилди.
Белгиленгендей, "Акы төлөнүүчү коомдук иштер" долбоору Эмгек, социалдык камсыздоо жана миграция министрлиги менен биргеликте БУУнун Дүйнөлүк азык-түлүк программасынын колдоосу аркылуу өлкөнүн бардык аймактарында ишке ашырылууда.
