Араванда пахта терүү башталды
Ош облусунун Араван районунда пахта жыйноо башталды. Быйыл райондо 1 252 гектарга пахта айдалган. Бул тууралуу Айыл чарба министрлиги кабарлады.
Дыйкандардын маалыматына ылайык, быйыл түшүм мол болуп, гектарынан 60–70 центнерге чейин түшүм алынууда. Райондо негизинен кытайлык "Элита" сорту өстүрүлүүдө.
Пахта өндүрүүдө тамчылатып сугаруу сыяктуу сууну үнөмдөөчү технологиялар колдонулуп жатат. Түшүм жыйноодо комбайндар пайдаланылып, бул дыйкандар үчүн экономикалык жактан үнөмдүү болууда.
Жыйналган пахта жергиликтүү кабыл алуучу ишканаларга өткөрүлүп, негизинен Кытай, Иран, Россия жана башка өлкөлөргө экспорттолот. Пахтанын баасы дүйнөлүк биржадагы бааларга жараша аныкталат.
Айыл чарба министрлиги пахта өндүрүүчүлөрдү колдоо жана заманбап технологияларды жайылтуу иштерин улантууда.
