Баткенде 375 орундуу мектептин курулушу башталды
Баткен шаарынын Кызыл-Жол чөлкөмүндө 375 орундуу жаңы мектептин курулушу башталды. Курулуштун башталышына карата салтанаттуу иш-чара өтүп, мектептин аймагына мезгил кутучасы салынды. Бул тууралуу облустук өкүлчүлүктөн билдиришти.
Иш-чарага президенттин Баткен облусундагы ыйгарым укуктуу өкүлү Мамыржан Рахимов, АРИСтин аткаруучу директору Калыбек Жумадылов, Баткен шаарынын мэри Сейтек Кулубаев жана жергиликтүү жетекчилер катышты.
Облус башчысы жаңы мектеп Баткен шаарындагы билим берүү инфраструктурасын өнүктүрүүгө маанилүү салым кошорун белгилеп, курулуш иштерин сапаттуу жана өз убагында бүткөрүү зарылдыгын айтты.
Жаңы мектепте окуучулардын сапаттуу билим алуусу үчүн бардык заманбап шарттар түзүлөт. Мектептин курулушу Кызыл-Жол аймагындагы балдар үчүн ыңгайлуу билим берүү шарттарын камсыз кылууга багытталган.
