Кыргызстан менен Орусиянын Жогорку соттору кызматташууну күчөтөт
Кыргызстандын Жогорку сотунун төрагасы Медербек Сатыевдин чакыруусу менен Орусиянын Жогорку Сотунун төрагасы Игорь Краснов Бишкекке расмий сапар менен келди. Бул тууралуу мекеменин маалымат кызматы кабарлады.
Маалымдалгандай, жогорку даражалуу конокту "Манас" эл аралык аэропортунан Медербек Сатыев тосуп алды. Тосуп алууга ошондой эле төраганын орун басары Шералы Камчыбеков, кеңешчи Руслан Мырзалимов жана Россиянын Кыргызстандагы элчиси Сергей Вакунов катышты.
Сапардын алкагында эки өлкөнүн сот жетекчилери Жеңиш аянтындагы Өчпөс отко гүлчамбар коюп, Улуу Ата Мекендик согуштун баатырларын эскеришти.
Андан соң Мамлекеттик резиденцияда эки тараптуу жолугушуу өттү. Анда сот өндүрүшүндө тажрыйба алмашуу жана байланыштарды чыңдоо маселелери талкууланды.
Ошондой эле төрагалар "Сот тутумунун көз карандысыздыгын жана аброюн чыңдоонун укуктук маселелери" аттуу эл аралык конференцияга катышты.
Конференцияда Медербек Сатыев соттун көз карандысыздыгы укуктук, финансылык жана санариптик жактан камсыздалышы керектигин белгиледи.
Ал эми Игорь Краснов киберкылмыштуулук, жасалма интеллектти мыйзамсыз пайдалануу жана дипфейктер сыяктуу жаңы коркунучтарга каршы күрөшүүдө эки өлкөнүн сотторунун диалогу өзгөчө баалуу экенин айтты.
Иш-чаранын жыйынтыгында Медербек Сатыев менен Игорь Краснов кызматташуу жөнүндө Макулдашууга кол коюшту. Документ сот адилеттигин өнүктүрүүгө жана жарандардын укуктарын коргоого багытталган.
Мындан тышкары, Сот адилеттиги жогорку мектеби менен В.М. Лебедев атындагы Орусия мамлекеттик сот адилеттиги университети билим берүү жана илимий кызматташуу жөнүндө макулдашууга кол коюшту.
