Кызыл-Кыяда 91 млн сомго инфраструктуралык долбоорлор ишке ашырылууда
Президенттин Баткен облусундагы ыйгарым укуктуу өкүлү Мамыржан Рахимов Кызыл-Кыя шаарына болгон жумушчу сапарынын алкагында шаардагы инфраструктуралык жана өндүрүштүк объектилердин абалы менен таанышты. Бул тууралуу облустук админстрациядан билдиришти.
Маалыматка ыылайык, иш сапардын жүрүшүндө облус башчысы социалдык объектилерге, жол жана коммуналдык инфраструктурага байланышкан долбоорлорду жеринен көрүп, жергиликтүү ишкерлер менен жолугушту. Жолугушууда өндүрүштү кеңейтүү, инвестиция тартуу жана жаңы жумуш орундарын түзүү маселелери талкууланды.
Мамыржан Рахимов ишкерлерге мамлекет тарабынан жеке секторду колдоого багытталган бир катар мүмкүнчүлүктөр түзүлүп жатканын белгилеп, жергиликтүү өндүрүштү өнүктүрүү аймактын экономикалык өсүшүндөгү негизги багыттардын бири экенин айтты. Ошондой эле ишкерлердин демилгелерин колдоого жана долбоорлорду ишке ашырууга шарт түзүүгө көңүл буруларын билдирди.
Кызыл-Кыя шаарында калк үчүн ыңгайлуу шарттарды түзүү максатында 2026-жылы бир катар инфраструктуралык долбоорлор ишке ашырылууда. Аталган иштердин жалпы көлөмү 91 млн сомдон ашат.
Учурда Кызыл-Кыядагы Совет, Масалиев, Чехов жана Султанов көчөлөрүндө жолдорду асфальттоо иштери жүргүзүлүүдө. Мындан тышкары №2 жана №4 орто мектептерде дем берүүчү гранттын каражаттарынын эсебинен оңдоо иштери аткарылууда. Шаардын көчөлөрүн жарыктандыруу жана ирригациялык тармактарды жаңылоо боюнча да тиешелүү иштер жүрүп жатат.
