Айыл чарба министрлиги биринчи жарым жылдыктын жыйынтыгын чыгарды
Бүгүн суу ресурстары, айыл чарба жана кайра иштетүү өнөр жайы министри Эрлист Акунбековдун төрагалыгы алдында министрликтин коллегиялык жыйыны өттү.
Ведомствонун маалыматына ылайык, Жыйында министрликтин 2026-жылдын биринчи жарым жылдыгындагы ишмердүүлүгүнүн жыйынтыктары, оруп-жыйноо иштеринин жүрүшү жана күзгү айдап-себүү кампаниясына даярдык маселелери каралды.
Биринчи маселе боюнча министрдин биринчи орун басары Илич Марсбек уулу баяндама жасап, аткарылган иштер жана алдыдагы сезондук иштер тууралуу маалымат берди.
Ошондой эле дыйкан-фермерлерди үрөн, күйүүчү-майлоочу материалдар, минералдык жер семирткичтер жана башка керектүү ресурстар менен өз убагында камсыз кылуу, айыл чарба техникаларынын даярдыгы талкууланды.
Мындан тышкары, азык-түлүк коопсуздугун камсыз кылуу жана агроөнөр жай комплексин 2030-жылга чейин өнүктүрүү программасынын негизги багыттары каралды. "Агросмарт" мамлекеттик ишканасынын ишинин жыйынтыктары жана алдыдагы пландары боюнча да маалымат берилди.
Жыйындын соңунда Эрлист Акунбеков оруп-жыйноо жана күзгү талаа иштерин уюшкандыкта өткөрүүнү, дыйкан-фермерлерди зарыл ресурстар менен өз убагында камсыз кылууну жана коюлган милдеттердин сапаттуу аткарылышын тапшырды.
Коллегиянын жыйынтыгында тиешелүү чечимдер кабыл алынып, министрликтин алдыдагы мезгилге карата негизги милдеттери белгиленди.
