Манас шаарында 530 орундуу мектеп курулууда
Курулуш, архитектура жана турак жай-коммуналдык чарба министри Нурдан Орунтаев Манас шаарындагы №13 Р. Азимбаев атындагы мектептин курулушунун жүрүшү менен таанышты.
Курулуш, архитектура жана турак жай-коммуналдык чарба министрлигинин маалыматына ылайык, долбоор республикалык бюджеттин эсебинен каржыланып, курулуш иштери үстүбүздөгү жылдын март айында башталган. Учурда объектте курулуш жана монтаждоо иштери комплекстүү жүргүзүлүп, имараттын фасадын жасалгалоо жана ички жасалгалоо иштери жүрүүдө.
Министр президенттин тапшырмасы менен курулуп жаткан жаңы мектептерде күн панелдерин орнотуу каралып жатканын белгиледи. Анын айтымында, бул энергияны үнөмдөөчү жана заманбап технологияларды мектеп курулушуна киргизүүнүн жаңы багыттарынын бири.
Жаңы мектеп 530 окуучуга ылайыкталып, анын жалпы аянты 2 846 чарчы метрди түзөт. Имаратта заманбап окуу класстары, лабораториялар, китепкана, ашкана, медициналык бөлмө, жыйындар залы, эмгекке үйрөтүү бөлмөлөрү жана спорт залы каралган.
