Бишкектин Аламүдүн-1 кичирайонундагы сейил бактын курулушу текшерилди
Бишкек шаарынын мэри Айбек Жунушалиев Аламүдүн-1 кичи районунда, Сагынбай Манасчы көчөсүнүн Ауэзов көчөсүнөн Чокан Валиханов көчөсүнө чейинки тилкесинде курулуп жаткан жаңы сейил бактын абалы менен таанышты. Бул тууралуу Бишкек шаардык мэриясынан билдиришти.
Маалыматка ылайык, объектте аймакты тазалоо жана даярдоо иштери жүргүзүлүп, учурда бетон куюу жана конструкцияларды орнотуу иштери башталган. Ирригациялык лотоктор орнотулуп, жаан-чачын сууларын кабыл алуучу торчолор монтаждалууда. Ошондой эле кирпич конструкциялары тургузулуп, жөө адамдар өтүүчү тротуарларга таман таш төшөө иштери башталды.
Долбоордун алкагында аймакты комплекстүү көрктөндүрүү каралып, унаа токтотуучу жай, заманбап балдар аянтчалары, автоматташтырылган сугаруу системасы жана тышкы жарыктандыруу орнотулат. Мындан тышкары, улуттук спорттун түрлөрү менен машыгууга арналган аянтчаларды түзүү пландалууда.
Мэр Айбек Жунушалиев жаңы сейил бак райондун тургундары үчүн эс алууга, спорт менен машыгууга жана үй-бүлөлүк эс алууга ыңгайлуу коомдук мейкиндикке айланышы керектигин белгиледи.
Ошол эле учурда долбоордун ишке ашырылышы “Веранда”кафесине байланыштуу маселени чечүү зарылдыгынан улам кечигүүдө. Шаар башчысы Жер пайдаланууну көзөмөлдөөбашкармалыгына бузуу иштерин баштап, долбоорду улантуу үчүн аймакты бошотууну камсыз кылууну тапшырды.
Мындан тышкары, бузуу иштеринен кийин калган таштандыларды тазалоо маселеси боюнча “Жасмин” кафесинин ээлери менен сүйлөшүүлөрдү жүргүзүү тапшырылды.
Мэр Айбек Жунушалиев объекттеги иштердин темпин күчөтүп, бардык курулуш жана көрктөндүрүү иштеринин сапаттуу жана талаптагыдай аткарылышын камсыз кылууну милдеттендирди.
