Манас шаарындагы үч ири объекттен 1 млрд сомго жакын каражат үнөмдөлдү
Манас шаарында курулуп жаткан үч ири социалдык объекттин сметалык наркы кайра каралып, бюджеттен 997,4 млн сом үнөмдөлдү. Бул тууралуу курулуш министри Нурдан Орунтаев билдирди.
Маалыматка ылайык, буга чейин Манас шаарынын мэриясы тарабынан облустук клиникалык оорукананын, 5 200 орундуу спорт комплексинин жана "Акылман" Президенттик мектеп-лицейинин курулушу башталган. Талдоонун жүрүшүндө объектилердин долбоордук-сметалык наркы жогору белгиленгени аныкталып, президент Садыр Жапаровдун тапшырмасы менен эсептер кайра каралган.
Натыйжада 7 кабаттуу облустук клиникалык оорукананын курулушунан 74,9 млн сом үнөмдөлдү. Объекттин жалпы наркы кайра эсептөөдөн кийин 1,5 млрд сомду түздү. Учурда имараттын 7-кабатындагы опалубка иштери аяктап, дубал тургузуу иштери 5-кабатка чейин бүткөрүлдү.
5 200 орундуу спорт комплексинин сметалык наркы 3 млрд сомдон ашык деп эсептелген. Кайра эсептөөнүн жыйынтыгында анын наркы 2,6 млрд сомго чейин төмөндөп, 479 млн сом үнөмдөлдү.
Ал эми "Акылман" Президенттик мектеп-лицейинин сметалык наркы 2,1 млрд сомдон 1,7 млрд сомго чейин азайтылды. Курулуштун бир чарчы метринин баасы 1 103 доллардан 750 долларга чейин төмөндөп, 443,5 млн сом үнөмдөлдү. Учурда курулуш-монтаждоо иштери аяктап, мектеп-лицейди жаңы окуу жылында пайдаланууга берүү пландалууда.
Министрликтин маалыматы боюнча, үч объекттин курулушу көзөмөлгө алынып, иштер белгиленген графикке ылайык жүргүзүлүүдө.
