Ош, Чүй жана Ысык-Көлдүн 126 айылы таза суу менен камсыздалат
Кыргызстанда "Суу менен камсыздоо жана санитарияга жалпы жеткиликтүүлүк" программасынын биринчи фазасынын алкагында 126 айылдык калктуу конушту коопсуз ичүүчү суу менен камсыздоо иштери жүрүп жатат. Бул тууралуу Айыл чарба министрлигинен билдиришти.
Долбоор Ош, Чүй жана Ысык-Көл облустарын камтыйт. Анын жыйынтыгында 450 миңден ашуун тургун таза ичүүчү сууга жеткиликтүү болуп, саркынды сууларды чыгаруу кызматтары жакшыртылат.
21-августта Чүй облусунун Сокулук районунда ичүүчү суу жана саркынды сууларды чыгаруу боюнча райондук муниципалдык ишкана түзүү маселеси талкууланды. Мындай ишканаларды өлкөнүн сегиз районунда түзүү каралууда.
Жыйында жаңы ишкананын иштөө модели, каржылоо механизмдери, ошондой эле суу системаларын пайдалануу жана техникалык тейлөө функцияларын өткөрүп берүү тартиби каралды.
Жыйынтыгында Сокулук районунда кызмат көрсөтүүчү муниципалдык ишкана түзүү демилгеси колдоого алынып, тиешелүү документтерди даярдап, айылдык кеңештердин кароосуна киргизүү чечими кабыл алынды.
Жаңы система райондогу ичүүчү суу кызматтарынын сапатын жана туруктуулугун жогорулатууга багытталган.
