Ош кышка камынууда: 6 153 тонна көмүр камдалды
Ош шаарында 2026-2027-жылдардагы күз-кыш мезгилине даярдык иштери жүрүп жатат. Бул тууралуу шаар мэриясынан билдиришти.
Маалыматка ылайык, кышка даярдык боюнча штабдын жыйынында тиешелүү мекеме-ишканалардын аткарып жаткан иштери талкууланды.
"Ош шаарынын жылуулук электр борбору" муниципалдык ишканасында үч буу казаны жылуулук берүүгө даярдалып, 3 115,3 тонна мазут жеткирилди.
Ал эми "Ошжылуулукэнерго" муниципалдык ишканасына караган 111 откананын 74ү кышка даярдалды. Көмүрдүн жалпы запасы 6 153 тоннаны түзөт.
Мындан тышкары, электр тармактарында, билим берүү жана саламаттык сактоо мекемелеринде да кышка даярдык иштери жүргүзүлүүдө.
Жыйындын соңунда тиешелүү жетекчилерге жылытуу мезгилин үзгүлтүксүз өткөрүү үчүн даярдык иштерин белгиленген мөөнөттө аяктоо тапшырылды.
