Ысык-Көлдө балык уулоо билетин QR-код аркылуу алууга болот
Ысык-Көлдө спорттук жана ышкыбоздук балык уулоочулар үчүн балык уулоо билетин электрондук түрдө алуу мүмкүнчүлүгү кеңейтилүүдө. Бул тууралуу Айыл чарба министрлигине караштуу Балык өнөр жайы комплекси департаменти билдирди.
Буга чейин көлдүн Кекилик участогуна балык уулоо эрежелери жана жол-жоболору көрсөтүлгөн маалыматтык тактайча орнотулган. Анда балык уулоо билетин онлайн алууга мүмкүндүк берген QR-код жайгаштырылган.
Учурда мындай маалыматтык тактайчаларды Ысык-Көлдүн башка балык уулоо участокторуна да орнотуу иштери жүрүп жатат.
Балык уулоочулар тактайчадагы QR-кодду сканерлеп, балык уулоо билетин электрондук түрдө ала алышат. Ошондой эле анда балык уулоонун негизги эрежелери жана талаптары көрсөтүлөт.
Департаменттин маалыматына ылайык, бул иштер мамлекеттик кызматтарды жеткиликтүү кылууга жана балык уулоо эрежелеринин сакталышын жакшыртууга багытталган.
