Быйыл Бишкек инфраструктурасын өнүктүрүүгө 611,2 млн сом бөлүнгөн
Быйыл Бишкек шаарында 64 инфраструктуралык объектти ишке ашырууга 611,2 миллион сом каралган. Бул тууралуу борбор калаанын 2026-жылдын биринчи жарым жылдыгынын жыйынтыктарына арналган коллегиялык жыйында маалымдалды.
Маалыматка ылайык, 2026-жылдын маанилүү окуяларынын бири Бишкек шаарынын 2050-жылга чейинки Башкы планынын бекитилиши болду. Документ борбор калааны алдыдагы 25 жылда өнүктүрүүнүн негизги багыттарын аныктайт. Аны ишке ашыруунун алкагында жер пайдалануу жана курулуш эрежелери иштелип чыгып, шаар аймагын натыйжалуу пайдаланууга жана курулуш тармагын системалаштырууга багытталууда.
Ошондой эле административдик-аймактык реформанын алкагында шаарга кошулган аймактарды 2030-жылга чейин өнүктүрүү планы бекитилип, муниципалдык кызмат көрсөтүүлөрдүн сапатын жакшыртуу боюнча иштер жүрүп жатканы белгиленди.
2026-жылы Бишкекте курулуштун титулдук тизмесине 64 объект киргизилип, аларды ишке ашырууга 611,2 млн сом каралган. Анын ичинен Ленин районунда – 22, Свердлов районунда – 15, Биринчи Май районунда – 16, Октябрь районунда – 11 объект курулат.
Жыл башынан бери бир катар долбоорлор ишке ашырылды. Май айында Маевка конушунда жалпы аянты 295 чарчы метр болгон спорт комплекси пайдаланууга берилди. Ал эми жыл аягына чейин Биримдик-Кут конушунда 280 орундуу бала бакчаны пайдаланууга берүү пландалууда.
Инженердик инфраструктураны өнүктүрүү боюнча Новопавловка конушунда эки скважина казылып, 9 чакырым суу түтүгү тартылды. Учурда долбоордун аткарылышы 45%ды түзөт.
Коллегияда жер мунапысынын жүрүшү да талкууланды. Жер мунапысы башталгандан бери комиссиялардын 290 жыйыны өткөрүлүп, 30 миңге жакын материал каралган. Анын жыйынтыгында 14 миң арыз канааттандырылып, тиешелүү токтомдор кабыл алынган.
