Караколдо жаңыланган Пушкин сейил багы пайдаланууга берилди
Каракол шаарындагы А.С. Пушкин атындагы борбордук сейил бак реконструкциядан кийин пайдаланууга берилди. Жаңыланган эс алуу жайынын ачылыш аземине Министрлер Кабинетинин төрагасы Адылбек Касымалиев катышты. Бул тууралуу Курулуш министрлигинен билдиришти.
Кечээ Каракол шаарындагы А.С. Пушкин атындагы борбордук сейил бак реконструкциядан кийин расмий түрдө пайдаланууга берилди.
Ачылыш аземине Министрлер Кабинетинин төрагасы Адылбек Касымалиев катышты. Иш-чаранын жүрүшүндө Курулуш, архитектура жана турак жай-коммуналдык чарба министри Нурдан Орунтаев реконструкциянын жыйынтыгы менен тааныштырды.
Жалпы аянты 7,5 гектарды түзгөн жана 100 жылдык тарыхы бар сейил бак толугу менен жаңыланып, шаар тургундары менен коноктор үчүн заманбап эс алуу мейкиндигине айланды.
Реконструкциянын алкагында сейил бакка жаңы аттракциондор, фонтан, спорттук жана балдар аянтчалары, амфитеатр жана кафетерий курулду. Ошондой эле инженердик тармактар жаңыланып, аймак толугу менен көрктөндүрүлүп, жалпысынан 12 заманбап аттракцион орнотулду.
Долбоорду Курулуш министрлигине караштуу "Кыргызкурулуш" мамлекеттик ишканасы ишке ашырды.
Жаңыланган сейил бак шаар тургундарынын жана Караколго келген туристтердин эс алуусу үчүн бардык шарттар түзүлгөн заманбап коомдук мейкиндик болуп калды.
