Бишкек ЖЭБинин каналынын жээги жаңы эс алуу аймагына айланат
Бишкек шаарынын мэри Айбек Жунушалиев ЖЭБдин технологиялык каналынын боюндагы аймакты көрктөндүрүү иштеринин жүрүшү менен таанышты. Долбоордун алкагында жакынкы райондордун жашоочулары үчүн заманбап эс алуу жана сейилдөөчү мейкиндик түзүлүүдө.
Мэриянын маалыматына ылайык, Чокан Валиханов көчөсүнөн Лермонтов көчөсүнө чейинки болжол менен 1 чакырымдык тилкеде коргоочу тосмолор жана тышкы жарыктандыруу үчүн мамылар орнотулуп, жээкти бекемдөө иштери жүргүзүлүүдө.
Мындан тышкары, учурдагы эски көпүрөнүн ордуна жаңы көпүрө куруу пландалган. Азыркы тапта объектте курулуш иштери уланууда.
Объектти кыдыруунун жыйынтыгында Айбек Жунушалиев жооптуу кызматтарга сейилдөөчү аймакты мындан ары көрктөндүрүү иштерин улантып, аны кеңейтүү мүмкүнчүлүгүн кароону тапшырды.
