Кегети капчыгайында жайытка зыян келтирүү фактысы аныкталды
Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматы Кегети капчыгайында рейд өткөрдү. Бул тууралуу министрликтен билдиришти.
Рейд жайыттарды сактоо жана жаратылыш аймактарында транспорт каражаттарынын талапка ылайык колдонулушун көзөмөлдөө максатында жүргүзүлгөн.
Текшерүү учурунда жайыт аймагында жүргөн эндуро мотоцикл аныкталып, жайытка зыян келтирүү фактысы боюнча жеринде административдик протокол түзүлдү.
Мындан тышкары, жайыт аймагында 4 квадроцикл жана автоунаа менен жүргөн жарандарга түшүндүрүү иштери жүргүзүлүп, эскертүүлөр берилди.
Министрликтен белгилешкендей, мындай рейддер Министрлер Кабинетинин 2026-жылдын 11-майындагы №330 токтомунун талаптарын аткаруу жана жайыттарды авто-мото транспорттун терс таасиринен коргоо максатында өткөрүлүүдө.
