Бишкектин батыш тарабында жаңы эс алуу жайы пайда болот
Бишкек шаарынын түндүк-батыш бөлүгүндө жаңы коомдук мейкиндик түзүү пландалууда. Бул тууралуу Курулуш, архитектура жана турак жай-коммуналдык чарба министрлиги билдирди.
Министрликке караштуу Бишкек шаар куруу жана архитектура башкы башкармалыгынын адистери С. Кайназаров жана Профсоюзная көчөлөрүнүн кесилишиндеги аймакты көрктөндүрүү боюнча эскиздик долбоор иштеп чыгышты.
Долбоордо ар кандай курактагы шаар тургундары үчүн заманбап жана ыңгайлуу эс алуу жайын түзүү каралган.
Анын алкагында балдар ойноочу аянтча, воркаут жайы, универсалдуу спорт аянтчасы, жөө жүргүнчүлөр үчүн тротуарлар жана унаа токтотуучу жай куруу пландалууда. Ошондой эле жашыл газондорду уюштуруп, бак-дарактарды отургузуу каралган.
Мындан тышкары, аймакка отургучтар, таштанды урналары, оюн жана спорттук жабдуулар, ошондой эле энергия үнөмдөөчү көчө жарыктары орнотулат.
Долбоорду ишке ашыруу аймакты жашылдандырууга, анын архитектуралык жана ландшафттык көрүнүшүн жакшыртууга жана тургундар үчүн коопсуз, ыңгайлуу коомдук мейкиндик түзүүгө багытталган.
Учурда эскиздик долбоор Бишкек мэриясынын тиешелүү райондук администрациясына кароого өткөрүлдү.
