Ак-Сай өрөөнүндө 20 ишкерге экологиялык талаптар түшүндүрүлдү
Жаратылыш ресурстары, экология жана техникалык көзөмөл министрлигинин Нарын регионалдык башкармалыгы Ак-Сай өрөөнүнүн Көк-Кыя аймагында экологиялык талаптардын сакталышы боюнча мониторинг жүргүздү.
Ведомствонун маалыматына ылайык, мониторинг учурунда аймакта жалпы 56 жаран каттоодо турганы, алардын 20сы жеке ишкерлик менен алектенери аныкталды. Ишкерлерге нормативдик төлөмдөрдү жүргүзүү боюнча эскертмелер берилип, калдыктарды туура башкаруу жана айлана-чөйрөнү таза сактоо талаптары түшүндүрүлдү.
Ошондой эле айрым объектилерде таштандыларды туура чогултуу үчүн капкагы бар атайын челектер орнотулганы белгиленди. Бул иштер башкармалыктын сунуштарынын негизинде жүргүзүлгөн.
Мындан тышкары, Кел-Суу көлүнүн аймагындагы кайык ээлерине жана туризм тармагында иштеген тараптарга көлдүн жана ага чектеш аймактардын тазалыгын сактоо, калдыктарды белгиленген талаптарга ылайык башкаруу боюнча түшүндүрүү иштери жүргүзүлдү.
