Алайдын төрт айылында таза суу тутумунун курулушу 95%га аяктады
Алай районунун Гүлчө айыл аймагындагы төрт айылда таза суу менен камсыздоо тутумунун курулушу 95%га аткарылды. Бул тууралуу Айыл чарба министрлигинен билдиришти.
Долбоор Октябрь, Кум-Шоро, Кара-Суу жана Кенжебай айылдарын камтыйт. Учурда негизги курулуш иштери аяктап, суу түтүктөрүн жеке турак үйлөргө киргизүү иштери жүрүүдө.
Долбоордун алкагында жалпы узундугу 24 чакырым болгон ички жана магистралдык суу түтүктөрү толугу менен төшөлдү. Ошондой эле сууну топтоо жана үзгүлтүксүз жеткирүү үчүн көлөмү 50 куб метр болгон эки жана 100 куб метрлик бир темир-бетон резервуар курулду.
Мындан тышкары, суу басымын туруктуу кармоо жана системанын үзгүлтүксүз иштеши үчүн зарыл болгон инженердик иштер аткарылды.
Учурда калган курулуш иштерин бүткөрүү, үйлөрдү суу түтүктөрүнө туташтыруу жана системаны толук пайдаланууга берүү иштери уланууда.
Долбоор толук аяктагандан кийин Октябрь, Кум-Шоро, Кара-Суу жана Кенжебай айылдарынын тургундары таза ичүүчү суу менен туруктуу камсыздалат.
