Ак-Ордо конушундагы жаңы мектеп окуучуларга эшигин ачат
Бишкек шаарынын Ак-Ордо конушундагы Теңир-Тоо көчөсүндө жаңы мектептин курулушу аяктады. Бул тууралуу Курулуш, архитектура жана турак жай-коммуналдык чарба министрлигинен билдиришти.
Жаңы билим берүү мекемеси Эгемендүүлүктүн 35 жылдыгына карата 12-сентябрда пайдаланууга берилет.
Долбоорго ылайык, мектеп төрт блоктон турган үч кабаттуу имарат болуп саналат. Курулуш республикалык бюджеттин эсебинен каржыланган.
Мектепте химия жана физика сабактары үчүн атайын лабораториялар, информатика жана эмгек класстары, ашкана, китепкана, ошондой эле керектүү жабдуулар менен камсыздалган спорт залы каралган.
Мындан тышкары, мектептин аймагында футбол, волейбол жана баскетбол аянтчалары курулган.
Жаңы мектептин пайдаланууга берилиши аймактагы мектептердеги орун тартыштыгын азайтууга жана окуучулар үчүн заманбап шарттарды түзүүгө мүмкүнчүлүк берет.
