Бишкекте экологиялык талаптарды бузган кафеге 28 миң сом айып салынды
Бишкек шаарындагы "Сария" кафесинде экологиялык талаптардын бузулушу аныкталып, мекемеге 28 миң сом айып салынды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, Экологиялык жана техникалык көзөмөл кызматынын Бишкек шаары жана Аламүдүн району боюнча регионалдык башкармалыгы жарандардын кайрылуусунун негизинде аталган кафеде текшерүү жүргүзгөн.
Текшерүүнүн жүрүшүндө мекеме тарабынан экологиялык мыйзамдардын талаптары сакталбаганы аныкталган.
Тактап айтканда, заттарды бөлүп чыгаруунун белгиленген тартибин бузгандыгы үчүн "Укук бузуулар жөнүндө" кодекстин тиешелүү беренесине ылайык, 28 миң сом өлчөмүндө айып пул салынды.
Мындан тышкары, кафенин жетекчилигине аныкталган мыйзам бузууларды жоюу жана мындан ары экологиялык талаптарды так сактоо боюнча расмий жазма буйрук берилди.
