Кызыл-Кыяда төрөт үйүнүн эскилиги жеткен: тургундар көйгөйлөрүн айтышты
Жогорку Кеңештин депутаты Махабат Мавлянова Кызыл-Кыя шаарынын тургундары менен жолугушуп, шаардагы социалдык жана инфратүзүмдүк көйгөйлөрдү талкуулады. Бул тууралуу парламенттин басма сөз кызматы билдирди.
Маалыматка ылайык, тургундар калктын саны өсүп жаткандыгына байланыштуу шаарга 2 мектеп жана 2 бала бакча куруу зарылдыгын белгилешти.
Ошондой эле 15-кичи райондо курулушу бүтпөй турган 500 орундуу мектепти аяктап, пайдаланууга берүү боюнча көмөк көрсөтүү өтүнүчү айтылды.
Мындан тышкары, эскирип, талапка жооп бербей калган төрөт үйүнүн ордуна жаңы имарат куруу жана шаарга маданият үйүн салуу маселелери көтөрүлдү.
Жолугушууда шаар үчүн маанилүү болгон таза суу маселеси да кеңири талкууланды. Тургундар таза суу долбоорун ишке ашыруу үчүн 1 млрд сом өлчөмүндө каражат бөлдүрүп берүүгө көмөк көрсөтүүнү өтүнүштү.
Депутат Махабат Мавлянова көтөрүлгөн маселелерди тиешелүү мамлекеттик органдарга жеткирип, алардын чечилишин көзөмөлгө аларын билдирди.
