Соң-Көлдө канаттууларды коргоо үчүн 1 чакырым тосмо орнотулду

Нарын облусундагы Соң-Көл көлүндө жаратылышты жана биологиялык ар түрдүүлүктү коргоо максатында 1 чакырымга созулган тосмо орнотулду. Бул тууралуу Жаратылыш ресурстары, экология жана техникалык көзөмөл министрлигинен билдиришти.

Маалыматка ылайык, иштер "Соң-Көл көлүнүн биологиялык ар түрдүүлүгүн сактоо жана жаратылыш ресурстарын туруктуу башкаруу" долбоорунун алкагында К. Базарбаев атындагы Каратал-Жапырык мамлекеттик жаратылыш коругунун Батай-Арал аймагында жүргүзүлдү.

Тосмо Соң-Көлдүн маанилүү орнитологиялык аймагына адамдардын жана транспорт каражаттарынын көзөмөлсүз кирүүсүн чектөө максатында орнотулду. Бул жапайы канаттуулардын жашоо жана көбөйүү шарттарын сактоого, алардын тынчтыгын камсыз кылууга жана аймакка адам факторунун таасирин азайтууга багытталган.

Соң-Көл суу жана суу жээгиндеги канаттуулардын маанилүү жашоо чөйрөлөрүнүн бири болуп саналат. Айрыкча көбөйүү мезгилинде адамдардын жана унаалардын көзөмөлсүз кирүүсү канаттуулардын жашоо шартына терс таасирин тийгизиши мүмкүн.

Батай-Арал аймагындагы тосмо Туруктуу өнүгүү стратегиясы институтунун жана Глобалдык экологиялык фонддун колдоосу менен орнотулду.