Таласта суу коргоо зонасында мыйзамсыз курулуштар аныкталды
Талас облусунун Кайыңды айылында жер жана суу мыйзамдарынын талаптарын бузуу фактылары аныкталды. Бул тууралуу Жерди жана сууну көзөмөлдөө боюнча кызматтан билдиришти.
Маалыматка ылайык, текшерүү учурунда Кайыңды суусунун жээгиндеги суу коргоо зонасында жеңил конструкциядагы курулуштар жайгаштырылганы белгилүү болгон.
Айрым курулуштар суу жээгине өтө жакын салынган. Ошондой эле эс алуу жайынын аймагында курулуштарды орнотуу жана жол салуу иштеринин натыйжасында жалпы 557,8 чарчы метр жер кыртышы бузулганы аныкталды.
Мыйзам бузуулар боюнча "Укук бузуулар жөнүндө" кодекстин тиешелүү беренелерине ылайык айып пул салынды.
Мындан тышкары, жер кыртышына келтирилген зыян 30 миң сом деп эсептелип, аныкталган мыйзам бузууларды жоюу үчүн 30 күндүк мөөнөт берилди.
