Бишкекте Улуттук шахмат академиясы ачылды
Бишкек шаарында Улуттук шахмат академиясы расмий ишин баштады. Анын ачылыш аземине Министрлер кабинетинин төрагасы Адылбек Касымалиев катышып, академияда жаш шахматчыларды окутуу жана машыктыруу үчүн түзүлгөн шарттар менен таанышты.
Ачылыш аземинде Адылбек Касымалиев шахматчылардын ата-энелери менен жолугуп, балдар менен жаштардын интеллектуалдык жана ар тараптуу өнүгүүсү үчүн ыңгайлуу шарттарды түзүүнүн маанилүүлүгүн белгиледи. Ошондой эле Адылбек Касымалиев борбордук шахмат тактасында символикалык биринчи жүрүш жасап, академиянын ишине расмий старт берди.
Академиянын негизги максаты — эл аралык деңгээлдеги шахматчыларды системалуу даярдоо, таланттуу жаштарды аныктап, колдоо жана өлкөдө шахмат кыймылын өнүктүрүү болуп саналат.
Касымалиевдин айтымында, президенттин жарлыктары Кыргызстанда шахматты өнүктүрүүгө жаңы дем берди. Учурда өлкөнүн 500 мектебинде 3–5-класстын окуучулары үчүн “Мектептерде шахмат” долбоору пилоттук негизде ишке ашырылууда.
“Улуттук шахмат академиясы таланттуу шахматчыларды даярдоонун маанилүү борборуна айланат жана Кыргызстанды эл аралык аренада татыктуу көрсөтө алган жаңы муундагы спортчуларды тарбиялоого салым кошот”, — деди Министрлер кабинетинин төрагасы.
Жаңы академия жаш шахматчыларды окутуу жана даярдоо, машыгууларды жана мелдештерди өткөрүү, ошондой эле Кыргызстанда шахмат спортун мындан ары өнүктүрүү үчүн аянтча болуп калды.
