Жашы жете элек кыз – улуу адамды кайырчылык кылууга калтырып кеткен
Бишкекте милиция кызматкерлери социалдык тармактарга мониторинг жүргүзүү учурунда белгисиз аял киши эркек кишини кайырчылык менен алектенүүгө калтырып кеткен учурдун видеосун аныктады. Ага ылайык, бул факт боюнча Бишкек шаарынын Октябрь РИИБнын маалыматтарды электрондук журналына катталып, тергөөгө чейинки текшерүү башталган.
Бишкек шаарынын Октябрь РИИБнин басма сөз кызматынын билдирүүсүнө караганда, текшерүүнүн катыйжасында, видеодогу жаран 2009-жылы туулган, чет өлкөлүк жашы жете элек - А.А. экени аныкталган. Ал кыз өзү кайырчылык кылган эмес, бирок эркек кишини кайырчылык менен алектенүүгө калтырып кетип турган.
Ушундан улам, жашы жете элек кыз менен профилактикалык жана түшүндүрүү иштери жүргүзүлүп, ага мыйзам талаптары жана коомдук тартипти сактоонун маанилүүлүгү түшүндүрүлүп берилди. Андан соң кыз Октябрь райондук ички иштер башкармалыгынын жашы жете электер менен иштөө инспекциясынын кызматкерлерине өткөрүлүп берилген. Андан ары ал - жашы жете электер арасында укук бузуулардын алдын алуу борборуна (ЦППН) жайгаштыруу үчүн жөнөтүлгөн.
Белгилей кетсек, Бишкек шаарында кайырчылык фактыларынын алдын алуу жана ага бөгөт коюу максатында “Кайырчылык” аттуу рейддик иш-чаралар өткөрүлүп, милиция кызматкерлери жолдордо, кесилиштерде, коомдук жайларда жана эл көп топтолгон аймактарда кайырчылык менен алектенген адамдарды аныктап турушат. Ошондой эле ИИББ жарандарды сак болууга чакырып, мыйзамдуулугу күмөн жараткан адамдарга акча бербөөнү сунуштап, мындай фактылар катталса, “102” кызматына кайрылууга чакырат.
