Ч.Айтматовдун айкелинин эскизин даярдап - 200 000 сом байге утуп алуу сунушталууда

Маданият, маалымат жана жаштар саясаты министрлиги залкар жазуучу Чыңгыз Айтматовдун айкелинин жана анын чыгармаларынын негизиндеги скульптуралык композициянын эскиздик долбооруна жарыяланган ачык сынактын мөөнөтү 29-ноябрына чейин созулат. Мындай билдирүүнү аталган министрликтен маалымдашты.

Билдирүүгө караганда, сынакка Кыргызстандын кесипкөй скульпторлору, архитекторлору жана чыгармачыл жамааттары катыша алышат. Жеңүүчү долбоор Беларусь Республикасынын Минск шаарындагы Чыңгыз Айтматов атындагы сейил бакка орнотуу үчүн сунушталат.

Байге фонду:

I орун — 200 000 сом;

II орун — 150 000 сом;

III орун — 100 000 сом.

Катышуучулар арыз, эскиздик долбоор, түшүндүрмө кат жана автор тууралуу маалымат тапшырышы керек.

Документтерди кабыл алуу дареги:

720000, Бишкек шаары, Чүй проспектиси, 112, Кыргыз Республикасынын Улуттук тарых музейинин имараты. Байланыш телефону: 0707 71 05 71.

Чыңгыз Айтматов атындагы сейил бак

Чыңгыз Айтматовдун 90 жылдыгына карата КРнын Беларусь Республикасындагы Элчилигинин демилгеси менен 2018-жылы Минск шаарындагы сейил бакка жазуучунун ысымы ыйгарылган.

Сейил бактын жалпы аянты 19,6 гектарды түзүп, анын 2,7 гектарын суу аянты ээлейт. Ал Минск шаарынын Завод жана Ленин райондорунун чектеш аймагында жайгашып, Слепян суу системасынын бир бөлүгү болуп саналат.

2018-жылдын 26-ноябрында сейил бакта беларусь скульптору Алесь Шатило жасаган Чыңгыз Айтматовго арналган эстелик белги расмий ачылган.