ЖК энергетикалык суусундуктардын сатылышын иликтөө үчүн комиссия түздү
Жогорку Кеңештин 7-октябрдагы жыйынында энергетикалык суусундуктардын жашы жете электерге сатылышын, алардын сапатын жана коопсуздугун иликтөө боюнча убактылуу депутаттык комиссия түзүү чечими кабыл алынды.
Демилгени “Ынтымак – Мекенчил” депутаттык тобу көтөрүп, топтун жетекчиси Талант Мамытов тааныштырды. Комиссия энергетикалык суусундуктарды жана ден соолукка терс таасир этиши мүмкүн болгон азыктарды жүгүртүүгө мамлекеттик көзөмөлдүн натыйжалуулугун да карайт.
Комиссиянын курамына 11 депутат — Азамат Исираилов, Азамжан Жалилов, Жаныбек Аматов, Адилет Белеков, Талант Мамытов, Бекмырза Чолпонбай уулу, Нуржамал Торобекова, Илимбек Кубанычбеков, Махабат Мавлянова, Дастанбек Жумабеков жана Алишер Козуев кирди.
Белгилей кетсек, мыйзамга ылайык, кофеин жана башка сергитүүчү кошулмаларды камтыган энергетикалык суусундуктарды 18 жашка чейинкилерге сатууга тыюу салынган.
