Кант кызылчасын өстүрүүгө гектарына 200 миң сомдой сарпталат
Учурда өлкөдө кант кызылчасы жыйналууда. Бул жылы кант кызылчасы 11,8 миң гектар аянтка айдалып, учурда анын 4,1 миң гектарында түшүм жыйналды. Буга байланыштуу "Ишкер Медиа" түшүм жыйноого кеткен чыгымдарды жана дыйкандар туш болгон кыйынчылыктарды билүү үчүн жеринен кабар алды.
Дыйкандардын айтымында, кант кызылчасын өстүрүүдө жерди иштетүүдөн тартып, түшүмдү жыйноого чейин бир топ каражат талап кылынат.
Фермер Миргасым Аллахверанов 1 гектар жерди иштетүүгө орточо 200 миң сомго жакын каражат жумшаларын айтты. Анын айтымында, бул чыгым түшүм жыйналгандан кийин акталат.
Мындан тышкары, дыйкандарга мамлекет тарабынан дизель майы жеңилдетилген баада берилери белгиленди.
"Жазында дизель майын 81 сомдон алганбыз. Азыр 96 сомдон алып жатабыз", - деди фермер.
