Автоунаасынан зыяндуу заттарды чыгаргандарга 68 миң сом айып салынды
Жаратылыш ресурстары министрлигине караштуу Экологиялык жана техникалык көзөмөл кызматынын инспекторлору Москва райондук Жол кыймылынын коопсуздугун камсыздоо бөлүмүнүн кызматкерлери менен бирге автоунааларды пайдаланууда экологиялык талаптардын бузулушун аныктоо максатында рейд жүргүзүштү.
Аталган министрликтин билдирүүсүнө караганда, рейддин жүрүшүндө Чүйдө автотранспорттон зыяндуу заттарды ашык чыгарган 7 факты аныкталып, жалпы 68 миң сом айып салынды.
Текшерүүнүн негизинде, зыяндуу заттарды бөлүп чыгаруу көлөмү белгиленген ченемдерден ашкан транспорт каражаттарын пайдалануу фактылары аныкталган. Ушудан улам, Укук бузуулар жөнүндө кодекске ылайык, жалпы суммасы 68 000 сомду түзгөн 7 административдик протокол түзүлдү.
Көзөмөл иш-чаралары экологиялык талаптардын сакталышын камсыз кылууга, зыяндуу заттардын ашыкча бөлүнүп чыгышына жол бербөөгө жана атмосфералык абанын сапатын жакшыртууга багытталган.
