Баткенде 29,7 млн сомго 2 бала бакча ачылды
Баткен районунун Суу-Башы айыл өкмөтүнө караштуу Бужум айылында эки бала бакча пайдаланууга берилди. Бул тууралуу президенттин Баткендеги өкүлчүлүгүнөн билдиришти.
Маалымдалгандай, алар "Келечек Үмүтү" бала бакчасы жана "Ак-Жолтой" бала бакчасынын кошумча корпусу. Ачылыш айылда мектепке чейинки билим берүүнүн жеткиликтүүлүгүн жогорулатууга багытталган.
Биринчи объект - Ынтымак жерлигиндеги "Келечек Үмүтү". Анын курулушуна жалпы 18 млн сом жумшалган. Каражат облустук фонддон 4 млн, райондук фонддон 5 млн, KOICA уюмунан 2 млн жана айыл өкмөтүнөн 7 млн сом болуп бөлүнгөн. Имарат 24 орунга ылайыкталып салынса да, учурда 50 бала тарбияланууда.
Экинчиси - "Ак-Жолтой" бакчасынын кошумча корпусу. Негизги корпус 100 орундуу болуп, 150 бала окуп келген. Жаңы корпус Ага Хан фондунун "Патрип" долбоору менен салынды. Долбоордун баасы 11 млн 751 миң сом, анын 2 млн сому айыл өкмөтүнөн.
Жаңы корпуста 2 окуу бөлмөсү жана усулдук бөлмө бар. Анын ишке кириши менен дагы 30 балага орун түзүлдү.
