КРУБ жана Ислам каржы ассоциациясы кызматташуу меморандумуна кол коюшту
Бүгүн Улуттук банкта ислам каржылоо принциптерин өнүктүрүү жаатындагы кызматташтык жөнүндө меморандумга кол коюлду. Улуттук банк жана “Ислам каржы ассоциациясы” юридикалык жактардын бирикмеси кол коюшту. Бул тууралуу Улуттук банктан кабарлашты.
Маалыматка ылайык, меморандум ислам каржылоо принциптери жаатындагы калктын финансылык сабаттуулугунун жана маалымдуулугунун деңгээлин жогорулатууну көздөйт. Ошондой эле финансы рыногунун катышуучуларынын кесиптик билимин өркүндөтүүгө, илимий, билим берүү жана эксперттик кызматташтыкты өнүктүрүү максатында тараптардын өз ара аракеттенүүсүнө багытталган.
Бул демилге Кыргыз Республикасында ислам каржылоо инфраструктурасын мындан ары өнүктүрүү жана бекемдөө үчүн маанилүү - деп, айтылат билдирүүдө.
“Ислам каржы ассоциациясы” ЮЖБ – бул Кыргыз Республикасынын ислам каржы индустриясын өнүктүрүү максатында банктарды, микрофинансылык уюмдарын, камсыздандыруу компанияларын, ислам каржылоо принциптери боюнча эксперттерди жана башка жактарды бириктирген кесиптик аянтча катары өз ишин жүзөгө ашыруучу уюм болуп саналат.
