15 млн сомдук алдамчылыкка шектелген жаран Молдовадан экстрадицияланды
Өзгөчө ири өлчөмдөгү алдамчылыкка айыпталып, эл аралык издөөдө жүргөн жаран Молдовадан Кыргызстанга экстрадицияланды. Бул тууралуу Башкы прокуратура билдирди.
Маалыматка ылайык, А.Р. аттуу жаран Кыргызстандын Башкы прокуратурасынын Молдованын компетенттүү органдары менен кызматташуусунун натыйжасында өлкөгө кайтарылган. Учурда ал тергөө абагына киргизилди.
Тергөө версиясына ылайык, шектүү жарандардын ишенимине кирип, автоунааларды алып берүү жана сатып берүү шылтоосу менен алдамчылыкка барган. Натыйжада жабырлануучуларга жалпы 15 млн сомдон ашык материалдык зыян келтирилгени айтылат.
Башкы прокуратура чет өлкөлөрдө жашырынып жүргөн адамдарды издөө, аларды Кыргызстанга кайтаруу жана кылмыш жоопкерчилигине тартуу боюнча иштер улантыларын белгиледи.
