Социалдык тармакта мөөнөтүнөн мурда үгүт жүргүзгөн үч жаранга эскертүү берилди
Борбордук шайлоо комиссиясы социалдык тармактарда шайлоо алдындагы үгүт жүргүзүү эрежелерине каршы келүү белгилери бар материалдарды жарыялаган үч жаранга эскертүү берип, билдирүүлөрүн өчүрүүнү милдеттендирди. Бул тууралуу БШКдан билдиришти.
Маалыматка ылайык, 21-октябрда БШКнын жумушчу тобунун жыйынында социалдык тармактарга жүргүзүлгөн мониторингдин жыйынтыктары каралды. Анын натыйжасында, шайлоо алдындагы үгүт иштеринин мыйзамда белгиленген мөөнөттөрүн жана шарттарын бузуу белгилери бар материалдар аныкталды.
"Шайлоо мыйзамдарынын талаптарына ылайык келбеген материалдарды жарыялаган социалдык тармактардын активдүү колдонуучулары Санжарбек Тилеков, Айбек Теңизбай жана Туратбек Мусакеевдерге эскертүү берилип, билдирүүлөрүн өчүрүү милдеттендирилди. Аталган жарандар мындан ары мыйзамдардын талаптарын сактоого жана ушул сыяктуу бузууларга жол бербөөгө даяр экендиктерин билдиришти" - деп айтылат билдирүүдө.
Борбордук шайлоо комиссиясы шайлоо алдындагы үгүт иштерин мыйзамда белгиленген мөөнөт башталганга чейин жүргүзүүгө тыюу салынарын эскертип - жарандарды, талапкерлерди, саясий партияларды жана шайлоо процессинин башка катышуучуларын мыйзам талаптарын сактоого чакырууда.
