Чаткалда 31,6 гектар жер жаңы ГЭС курууга берилди
Министрлер Кабинети Чаткал районунун Каныш-Кыя айылындагы аянты 31,59 гектар болгон жер тилкесин чакан гидроэлектростанция куруу үчүн трансформациялоо чечимин кабыл алды.
Документке ылайык, мамлекеттик менчиктеги бул жер тилкеси "айыл чарба багытындагы жерлер" жана "токой фондуна кирген жерлер" категориясынан "өнөр жай, транспорт, байланыш, энергетика, коргонуу жана башка багыттагы жерлер" категориясына өткөрүлдү.
Трансформацияланган жерлердин курамына төмөнкүлөр кирет:
- 14,61 гектар сугат жерлер;
- 1,36 гектар огород жерлери;
- 2,87 гектар пайдаланылбай жаткан жерлер;
- 0,25 гектар богардык (сугарылбаган) жерлер;
- Чаткал токой чарбасына тиешелүү 12,5 гектар токой фондунун жерлери (анын ичинде жайыттар, жолдор жана дарыя жээктериндеги жер тилкелери).
Чаткал районунун жергиликтүү мамлекеттик администрациясына төмөнкү милдеттер жүктөлдү:
- жерлердин эсепке алуу документтерине тиешелүү өзгөртүүлөрдү киргизүү;
- жер тилкесин максаттуу пайдаланууну камсыз кылуу;
- жоголгон айыл чарба жерлерин түшүмдүүлүгү төмөн жерлердин эсебинен калыбына келтирүү;
- шаар куруу (градостроительство) документациясын иштеп чыгуу жана бекитүү;
- жер казуу жана курулуш иштерин жүргүзүүдө археологиялык көзөмөлдү камсыз кылуу;
- жер тилкеси пайдаланылбай калган же максатсыз колдонулган учурда аны кайра алып коюу.
