Кыргызстан менен Россия айыл чарба кызматташтыгын кеңейтүүнү талкуулашты
Айыл чарба министри Эрлист Акунбеков Москвадагы иш сапарынын алкагында Россиянын айыл чарба министри Оксана Лут жана Россельхознадзордун жетекчиси Сергей Данкверт менен жолугушту.
Ведомствонун маалыматына ылайык, тараптар айыл чарба тармагындагы кызматташтыктын учурдагы абалын жана келечегин талкуулашты. Россия Кыргызстан үчүн негизги соода-экономикалык өнөктөштөрдүн бири экени белгиленди.
Кыргыз тарап эт, сүт, кайра иштетилген азыктар жана балык продукцияларын Россияга экспорттоону кеңейтүүгө кызыкдар экенин билдирди.
Ошондой эле агроөнөр жай комплексинде кооперацияны өнүктүрүү планы, асыл тукум мал жеткирүүнү көбөйтүү, ветеринария жана илимий кызматташтык маселелери каралды.
Жыйынтыгында тараптар кызматташууну мындан ары тереңдетүүгө даяр экенин билдиришти.
