Эски Ош базарында 8,5 миң соода оруну бар экени айтылды
Жогорку Кеңештин жыйынында депутат Куванычбек Конгантиев жаңы Ош базары боюнча долбоорду ишке ашырууга ким жооптуу экенине кызыкты.
"Кечээ жеринде барып көрүү учурунда Иш башкармалыгынын жетекчиси 916 соодагер көчүрүлүп, ар бири өз ордун ала турганын айтты. Бирок бүгүн Ленин районунун акиминин айтымында, учурда Ош базарында 8,5 миң соода орду бар экен", — деди депутат.
Курулуш министри Нурдан Орунтаев бул долбоорду ишке ашыруу Президенттин Иш башкармалыгы тарабынан жүргүзүлүп жатканын белгиледи. Ошол эле учурда Бишкек шаарынын вице-мэри Рамиз Алиев соодагерлердин так саны азырынча такталып жатканын билдирди. Ал эми Министрлер Кабинетинин төрагасынын орун басары Данияр Амангельдиев бийлик бардык соода субъекттеринин жаңы базардан орун алуусуна кызыкдар экенин айтып, долбоордун ишке ашырылышына өкмөт жалпы жоопкерчилик тартарын кошумчалады.
"Бул долбоорду Президенттин иш башкармалыгы ишке ашырат, соодагерлердин санын мэрия аныктайт, суроолорго Курулуш министрлиги жооп берет экен. Анда так айтыңыздарчы: эл кимге кайрылышы керек? Бардык маалыматты бере ала турган органдар кирген ведомстволор аралык комиссия түзгүлө. Эл кайда барып, кимге суроо берерин билиши керек. Анткени акимиатта билишпейт, мэрияда билишпейт, Иш башкармалыгына жетүү дээрлик мүмкүн эмес. Мен бул комиссия соодагерлер кандай тартипте, кандай мөөнөттөрдө көчүрүлөрүн жана орундар кандай принцип менен бөлүштүрүлөрүн так аныктап берсин деп суранам», — деди Куванычбек Конгантиев.
Данияр Амангельдиев процесстин ачык-айкын болушу үчүн мэрия менен биргеликте жумушчу топ түзүлөрүн билдирди. Анын айтымында, бул жумушчу топ кийинки жумада түзүлөт.
