Нарын облусундагы 13,2 гектар жер чек ара аскер базасын куруу үчүн берилди
Министрлер кабинети 11-марттагы токтому менен Чек ара кызматы үчүн жаңы аскер базасын куруу максатында Нарын облусундагы 13,2 гектар айыл чарба жерин коргонуу багытындагы жер категориясына өткөрдү.
Сөз Нарын районундагы Дөбөлү айыл аймагында жайгашкан жер тилкеси тууралуу болуп жатат. Бул жер мурда сугат айдоо жери статусуна ээ болуп, мамлекеттик менчикте турган.
Айдоо жерин башка категорияга өткөрүү улуттук коопсуздук муктаждыктары үчүн мораторийден өзгөчө учур катары уруксат берген мыйзамга ылайык жүргүзүлгөн.
Эми бул аймак расмий түрдө өнөр жай, транспорт, байланыш жана коргонуу багытындагы жерлер категориясына киргизилди. Жергиликтүү мамлекеттик администрация жер каттоо документтерине тиешелүү өзгөртүүлөрдү киргизип, жер тилкесинин максаттуу пайдаланылышын камсыз кылууга милдеттүү.
Токтом долбоорду даярдоо жана ишке ашыруу учурунда бир катар талаптарды белгилейт:
- жер титирөөгө каршы чараларды жүргүзүү жана кар жана жаан сууларын агызуу системасын түзүү;
- курулуш учурунда тарыхый мурастар табылган учурда аларды коргоо үчүн археологдорду тартуу;
- курулуштун бардык этаптарында экологиялык жана санитардык талаптарды сактоо;
- долбоорду жарандык авиациянын талаптары менен макулдашуу.
Эгерде күч түзүмү бул жер тилкесин белгиленген максатта пайдаланбай калса, бийлик аны мурунку абалына келтирүүгө милдеттүү болот.
Долбоордун аткарылышын көзөмөлдөө Президенттик администрацияга жүктөлгөн. Документ расмий жарыялангандан он күндөн кийин күчүнө кирет.
