Жаш Гвардия, Лев Толстой көчөлөрүнүн кесилишиндеги 64 объект бузулат
Жаш Гвардия проспекти менен Лев Толстой көчөсү кесилишинде заманбап эстакадалык көпүрөнү камтыган транспорттук жол айрыгын куруу пландалып жатканын мэрия билдирди. Жүргүзүлгөн инвентаризациянын жыйынтыгында 64 объект бузулары аныкталган.
Бул объектилердин арасында жеке менчикке таандык жерлер да, ошондой эле убактылуу пайдаланууга берилген муниципалдык объектилер да бар.
Мындан тышкары, айрым объектилер Ала-Арча дарыясынын суу коргоо аймагында жайгашкан.
Мэрия белгилегендей, чарбалык субъекттердин ээлери менен түшүндүрүү иштери жүргүзүлгөн жана тиешелүү билдирүүлөр берилген. Жер пайдаланууну көзөмөлдөө башкармалыгы тарабынан келишимдери мыйзамдуу түрдө токтотулган объектилерди демонтаждоо иштери башталды.
Шаар тургундары шаарды өнүктүрүүгө багытталган бул иштерге түшүнүү менен мамиле кылууга чакырылды. Белгиленгендей, мамлекеттик актылары бар жер тилкелеринин ээлерине альтернативдүү жер тилкелери же тиешелүү акчалай компенсация сунушталып жатат.
Шаар бийлигинин маалыматы боюнча, 2026-жылдын биринчи чейрегинде жолдорду реконструкциялоо программасынын алкагында 246 жеңил типтеги объект жана 152 капиталдык курулуш бузулган.
