Турак жай салыктарын автоматтык түрдө эсептөө системасы киргизилди
Марттан тарта өлкөдө мамлекеттик кадастр кызматынын маалыматтарына негизделген салыктарды автоматтык эсептөө системасы киргизилди. Бул кызмат жарандар үчүн салык төлөөнү жеңилдетүүгө, адам факторун азайтууга жана тең шарттарды камсыздоого багытталган.
Салык кызматынын карыздарды өндүрүүнү көзөмөлдөө жана жергиликтүү салыктар башкармалыгынын башчысы Туратбек Күлчороев билдиргендей, буга чейин мүлк ээлери салыктын суммасын өз алдынча эсептеп келген.
“Турак эмес мүлккө салык квартал сайын, ал эми турак жай үчүн жылына бир жолу төлөнөт. Мурда эсептөө үчүн жарандар мамлекеттик актыларды же техникалык паспортторду алып келип, бул процесс 3-4 саатка чейин убакыт алчу. Эми болсо салык автоматтык түрдө эсептелет. Бирок кадастрдык маалыматтар ар дайым так боло бербегендиктен айрым көйгөйлөр жаралууда”,- деди ал.
Анын айтымында, мунун негизги себептери төмөнкүлөр:
- экономикалык активдүүлүктүн жогору болушу (ишмердүүлүктүн тез-тез өзгөрүшү, курулуштар);
- айрым жарандардын маалыматтарын тактабаганы;
- мамлекеттик каттоо кызматындагы маалыматтардагы дал келбестиктер (аянты же багыты боюнча талаш маселелер);
- айрым объекттер көчөлөрдүн кесилишинде жайгашып, система эки башка дарек катары көрсөтүп коюшу;
- мүлктөр башка адамдардын атына катталып калышы.
Күлчороев белгилегендей, маалыматтарды тактоо жана системаны туура иштетүү үчүн Мамлекеттик салык кызматы, "Салык Сервис" жана "Кадастр" мамлекеттик мекемелеринин ортосунда атайын жумушчу топ түзүлүп, күчөтүлгөн тартипте иш алып барууда.
Салык кызматы жарандарды жеке кабинет аркылуу эсептелген суммаларды текшерүүгө чакырат. Эгер талаш маселелер жаралса, 0221 000 116 номери аркылуу кайрылууга болот. Кайрылуулар саат 09:00дөн 18:00гө чейин, дем алыш күндөрүнөн тышкары кабыл алынат.
