Үйүңүздөн чыкпай туруп, ипотекалык насыяга кайрылуу үчүн "Мамлекеттик ипотекалык компания" ААК (МИК) системасында каттоодон өтүшүңүз керек. Төмөндө бул тууралуу кадам сайын көрсөткөн нускама беребиз.

Электрондук порталда каттоо 24/7 иштейт, андыктан уюлдук телефон болсо жетиштүү. Шилтеме аркылуу онлайн катталсаңыз болот.

1-кадам. Каттоо

Каттоо үчүн сиз өзүңүз жөнүндө маалыматты толтурушуңуз керек. Бүт процесс үч блоктон турат:

1. Толук аты-жөнү, туулган жылы жана паспорттун маалыматтары
2. Катталган жери, иш жүзүндө жашаган жери жана үй-бүлөлүк абалы
3. Жумушу тууралуу маалымат жана байланыш телефондору.

Бардык жер толгондон кийин "Катталуу" дегенди басыңыз.

Көңүл бургула! 21 жашка чыга элек болсоңуз, каттоодон өтүп, ипотека ала албайсыз.

2-кадам. Системага кирүү

Биринчи кадам аяктагандан кийин, системага кирүү үчүн убактылуу сырсөз менен каттоо учурунда көрсөткөн телефонуңузга SMS келет. Ал төрт мүнөткө гана жарактуу, ошондуктан сиз дароо бул сырсөз аркылуу системага кирип, андан кийин өзүңүздүн сырсөзүңүздү орнотуп, аны өзгөртүүңүз керек.

3-кадам. Үй-бүлө тууралуу маалымат

"Жеке кабинетке" өтүп, андан "Үй-бүлө маалыматы" бөлүмүнө өтүшүңүз керек. Бул бөлүмдө "Үй-бүлө маалыматын өзгөртүү" баскычын басып, жубайыңыздын/жолдошуңуздун паспорттук маалыматтарын, 18 жаштан жогорку балдардын паспорттук маалыматтарын толтуруңуз жана канча жашы жете элек балдарыңыз бар экенин көрсөтүңүз.

4-кадам. Кызмат акысы

Ипотекага арызды тастыктоо үчүн мамлекеттик органдардан өзүңүздүн маалыматтарыңызды тастыктоо керек: үй-бүлөлүк абалы, турак жайдын жоктугу же бар экендиги, паспорттук маалыматтар. Буга кызмат акы төлөнөт. Сурамдардын баасы бир адамга 179 сомду түзөт, анын ичинен:

• 20 сом – туруктуу СМС билдирүү
• 2 сом – паспорттогу маалыматтарды тастыктоо жана үй-бүлөлүк абалды текшерүүгө
• 157 сом – турак-жай болуп, болбогондугу тууралуу маалыматты текшерүүгө.

Тиркемедеги маалыматтарды тастыктоо өтүнүчүн төлөө үчүн "Кызматтарды төлөө" баскычын басыңыз. Система сизге электрондук төлөмдөр – "Элкарт мобайл", "Элсом", Mega Pay, Balance.kg, "О!Деньги" жана "РСК 24" аркылуу төлөө үчүн сиздин жеке кабинетиңизди көрсөтөт. Кызматтарга төлөөнүн жалпы суммасы үй-бүлөнүн курамына жараша болот.

5-кадам. Жеке маалыматтарды издөөгө макулдук

Жеке маалыматтарды издөөгө макулдук Balance.kg мобилдик тиркемесинде берилет. Аны катталган адам, ошондой эле эгер бар болсо, анын жубайы же жолдошу да жүктөп алышы керек.

Тиркемеде идетификациялоодон өтүңүз. Анан "Мамлекеттик кызматтар" бөлүмүн, андан кийин "Мамлекеттик ипотекалык компания" дегенди басыңыз. Кредит алуучу адам "МИКке каттоо" опциясын, ал эми анын жубайы же жолдошу "Маалымат издөөгө жубайынын/жолдошунун макулдугу" опциясын тандашы керек. Баскычтарды адашып басып албаңыз — бул маанилүү!

Биз "Жеке эсепке" кайтып келгенден кийин, "Жеке маалыматтарды колдонууга макулдук берүү" бөлүмүнө өтүңүз. Эгер баары туура аткарылса, "Макулдук алынды" деген жазуунун астында белгилер коюлган болот.

6-кадам. Ипотекага арызды берүү

"Жеке кабинетте" "Менин тиркемелерим" бөлүмүнө өтүп, андан кийин "Арыз берүү" баскычын басыңыз. Система сизди өзүңүз жөнүндө маалыматты толтурууга багыттайт. Өзүңүз жана үй-бүлөңүз тууралуу маалыматтарды текшерүү же кайра киргизүү, ошондой эле үй насыясы жөнүндө кошумча маалымат берүү зарыл. Бүт процесс төрт блоктон турат:

• Жеке маалымат, паспорттун реквизиттери жана дареги
• Үй-бүлөлүк маалымат
• Жумуш жана үй-бүлөнүн айлык кирешеси жөнүндө маалымат
• Насыянын продуктусу, өздүк салымы, сатып алынган турак жайдын наркы, кредиттин мөөнөтү жана суммасы.

Бардык талап кылынган бөлүмдөрдү толтургандан кийин, берилген документтердин жана көрсөтүлгөн маалыматтардын аныктыгын ырастаңыз. Андан кийин арызды сактап, тастыктоо үчүн МИКке жөнөтүңүз.

7-кадам. Арыздын каралуусун күтүңүз

Өтүнмөнү тапшыргандан кийинки статусу "Карап чыгууга тапшырылды" болушу керек. Бөлүм ошондой эле кезекте турган арыздын номерин көрсөтөт. Карап чыгуу мөөнөтү келип түшкөн арыздардын санына жараша үч айга чейин созулат. Кредит алуу үчүн кезекке "МИК карап чыкты" статусунан кийин турса болот.