"Элдик турак жай компаниясы" аркылуу ипотекалык кредитти кантип алса болот? — жол-жобосу

Мамлекеттик ипотекалык компания (МИК) социалдык, жеңилдетилген жана арзан деп үч багыттагы ипотекалык насыяларды берип келет. Бирок анын ичинен дагы "Элдик турак жай компаниясы" аркылуу да бардык каалоочуларга ипотекалык насыяларды берет.

"Элдик турак жай компаниясы" МИКтин алдында түзүлгөн туунду компания, тагыраак айтканда, МИК жана Мамлекеттик камсыздандыруу уюму анын акционерлери болуп саналат.

Бул компаниянын шарттары бир топ жеңилдетилген. Тактап айтканда, үй алууну каалаган кардар компанияда турак жай депозиттик эсебин ачып, акчасын салып, канча бир талаптагыдай сумма топтолгондон кийин ипотекалык насыя алса болот. Анын жылдык үстөк пайызы 8%дан жогору.

"Элдик турак жай компаниясы" өлкө боюнча келишимдик-сактык системасы менен иштеген жалгыз мамлекеттик мекеме. Чектөө жок болгондуктан, кардарлар бизнес класстагы, иштеген жеринен алыс болгон башка аймактардан үй ала алышат. Күрөөгө насыяга алынып жаткан мүлк кабыл алынат. Кредиттик калькулятор аркылуу болжолдуу бааны бул жерден санап көрсөңүз болот.

«Элдик турак-жай компаниясы» Кыргызстандагы эң пайдалуу пайыздык чен менен өзгөчө турак жай насыясын сунуштайт:

• үй сатып алууга
• турак жайды оңдоп жана жакшыртууга (курулуш материалдарын сатып алууга, куруучулардын эмгек акысын төлөөгө);
• үй салууга (жер тилкесин сатып алууга).

Турак жай насыясынын пайдалуу өзгөчөлүктөрү:

• Жылдык пайыздык чен 6%дан башталат
• Насыянын максималдуу суммасы 4 млн сом
• Өзүңүздүн атыңызда турак жай барбы же жокпу жана мамлекеттик ишкана, бюджеттик мекеме же жеке ишкана болобу, ал жагдайлардан көз карандысыз, КРнын бардык жарандары арзан турак жай насыясын ала алышат.
• Насыянын суммасы турак жайдын баасынын 50% гана түзөт. Себеби, сиз «Элдик турак-жай компаниясы» турак жай-сактык кредиттик компаниясынын аманаттык эсебинде үй алууга керектүү сумманын 50%ын алдын ала топтоп аласыз.

Программанын катышуучусу (максаттуу топ): "Жеңилдетилген ипотека" жана "Арзан ипотека" турак жайын каржылоо багыттары боюнча тандоо критерийлерине жооп берген, ТАКК менен башкы макулдашуу түзгөн жарандар.

Кредиттин суммасы:

• "Жеңилдетилген ипотека" турак жайын каржылоо багыты боюнча — 4 млн сомго чейин
• "Арзан ипотека" турак жайын каржылоо багыты боюнча — 5 млн сомго чейин.

Пайыздык чен:

• "Жеңилдетилген ипотека" турак жайын каржылоо багыты боюнча баалоо көрсөткүчүнө ылайык жылдык 6% дан 8% чейин
• "Арзан ипотека" турак жайын каржылоо багыты боюнча баалоо көрсөткүчүнө ылайык жылдык 10% дан 12% чейин.

Кредиттин мөөнөтү: салымды топтоо мөөнөтүнө жараша 25 жылга чейин.

Баштапкы төгүм: турак жай-аманат салымы башкы макулдашуунун келишимдик суммасынан 30%дан кем болбоого тийиш.

Кредитти берүүнүн мөөнөттөрү: турак жай-аманат салымынын (депозитинин) келишиминин суммасынан 30%дан кем эмес топтолгон учурдан тартып, баалоо көрсөткүчү жана/же күтүү мезгили менен аныкталат.

"Элдик турак жай компаниясы" байланыш телефондору: 0312 61-0718 0550 29 21 21; 0509 29 21 21; ал эми сайтын бул жерден көрсөңүз болот.

Ал эми кошумча маалымат катары айтсак, МИК үч багытта насыя берет:

• "Социалдык ипотеканын" алкагында жарандардын айрым категориялары, тагыраак айтканда, көп балалуу, жалгыз бой ата-энелер, мүмкүнчүлүгү чектелгендер 4% төмөн үстөк менен ипотекалык насыя ала алышат.
• Жеңилдетилген ипотеканы жалпы мамлекеттик органдарда, жергиликтүү өз алдынча башкаруу органдарында эмгектенген жарандар 6%дан баштап ала алышат.
• Арзан ипотеканы ишинин чөйрөсүнө карабастан, эмгек/чарба/ишкердик менен алектенген КРнын бардык жарандары 8% менен ала алышат.