Кытайда 8 юандык Sileme колдонмосу эң төлөмдүү колдонмого айлана баштады
Кытайда жалгыз адамдар үчүн арналган Sileme аттуу колдонмо популярдуулукка ээ болууда. Колдонмонун аталышы "Сен өлдүңбү?" деп которулат. Бул тууралуу Global Times басылмасы жазды.
Колдонмо колдонуучудан күн сайын өз абалын билдирип турууну суранат. Эгер колдонуучу эки күн катары менен активдүүлүк көрсөтпөсө, система анын байланыш адамына электрондук почта аркылуу эскертүү жөнөтөт. Мунун жардамы менен жакындары адамдын башына бир нерсе түшсө, ыкчам билип калууга мүмкүнчүлүк алат.
Sileme App Store’догу эң көп жүктөлгөн төлөмдүү колдонмолордун рейтингин баштады. Иштеп чыгуучулардын айтымында, акыркы күндөрү жүктөөлөрдүн саны 100 эседен ашык көбөйгөн. Колдонмону колдонуу баасы — 8 юань.
Колдонмонун интерфейси жөнөкөй: анда бир гана "Белги коюу" баскычы бар. Иштеп чыгуучулар аны жалгыз адамдар үчүн "жеңил коопсуздук куралы" деп мүнөздөшөт.
Долбоорду 30 жашка чыга элек үч жаш ишкер көз карандысыз стартап катары иштеп чыгышкан.
Колдонмо Кытайда вирус сыяктуу тез таралып, социалдык тармактарда кызуу талкууланууда. Айрым колдонуучулар сервистин аталышы Кытайдын маданий салттарына туура келбейт деп сынга алып, аны Hupzheme ("Сен тирүүсүңбү?") деп өзгөртүүнү сунуштоодо.
Сынчылардын айтымында, Sileme улгайган адамдар үчүн гана эмес, жалгыз жашаган жаштар үчүн да пайдалуу кызмат. Долбоордун командасы билдиргендей, келечекте билдирүүлөрдү SMS аркылуу жөнөтүү, билдирүү алмашуу функциясын кошуу жана улгайган адамдарга ыңгайлуу чечимдерди иштеп чыгуу пландалууда. Ошондой эле жаңы аталыш боюнча сунуштар да караларын белгилешти.
