Казакстан Тынчтык кеңешине 1 млрд доллар кошпой киргенин билдирди
Казакстан Дональд Трамптын демилгеси менен түзүлгөн Тынчтык кеңешине эч кандай каржылык салым кошпостон мүчө болгонун "Казинформ" мамлекеттик агенттиги Ак ордонун басма сөз кызматына шилтеме берип маалымдады.
Ак ордонун басма сөз кызматынын билдирүүсүндө, Тынчтык кеңешине кирүү үчүн мамлекеттин эгемен чечими гана талап кылынары белгиленген. Кеңешке мүчө болгон күндөн тартып, мамлекеттин анда болуу мөөнөтү үч жылды түзөт. Уставда көрсөтүлгөн 1 млрд доллар өлчөмүндөгү ыктыярдуу салым мүчөлүккө кирүүнүн милдеттүү шарты болуп эсептелбейт. Бул — ар бир катышуучунун өз укугу.
Маалыматка ылайык, эгерде мамлекет алгачкы бир жылдын ичинде 1 млрд доллар өлчөмүндө салым кошсо, анда ал кеңештеги катышуусун белгиленген үч жылдык мөөнөттөн узартуу мүмкүнчүлүгүнө ээ болот.
22-январда Швейцариянын Давос шаарында өткөн Дүйнөлүк экономикалык форумдун алкагында Казакстандын президенти Касым-Жомарт Токаев Тынчтык кеңешинин уставына кол койду. Аземге Казакстандын президенти менен катар 18 өлкөнүн лидерлери жана өкүлдөрү катышты.
Ошол эле учурда Bloomberg агенттиги АКШ администрациясы Кеңеште туруктуу орун алууну каалаган мамлекеттерден кеминде 1 млрд доллар салым кошууну суранып жатканын жазган.
