Белгилүү кинорежиссер Садык Шер-Нияз моноблоктордон үй куруу технологиясын иштеп чыгып, патенттеди
Кыргызстандын Франциядагы элчиси жана Кыргыз Республикасынын ЮНЕСКО боюнча БУУдагы туруктуу өкүлү Садык Шер-Нияз жеңил конструкциялардан — моноблоктордон турак жай куруунун жаңы технологиясын иштеп чыгып, аны патенттеген.
Ал бул технология жеңил жука болот конструкциялары, структуралык-изоляциялык панелдерге, ошондой эле фин жана канадалык курулуш ыкмаларына альтернатива экенин билдирди.
Курулуш идеясы кыргыз боз үйүнүн архитектуралык философиясынан улам келип чыккан.
«Биздин боз үй — миңдеген жылдар бою тажрыйба жүзүндө өзүнүн бекемдигин далилдеген эң чыдамкай конструкция», — деп белгилейт Шер-Нияз.
Жеңил үйлөр Lego конструктору сыяктуу принципте өтө кыска убакытта курулат. Курулуш аба ырайына көз каранды эмес, демек сезондук чектөөлөр да жок. Ошол эле учурда конструкция дээрлик каалаган жылуулук изоляциялоочу материалдар менен толтурууга же жылуулоого мүмкүнчүлүк берет.
"Бул — тез курулуучу үйлөрдүн жаңы технологиясы. Бүгүнкү күндө турак жай курууга өтө көп убакытты жана каражатты коротуп жатабыз — курулуш маданиятын өзгөртүүгө убакыт келди. Жаңы доор коомдун алдына жаңы чакырыктарды коюуда: биз технологиялык доорго кадам таштадык, анда баары тездик менен өнүгүүдө. Ошондуктан дүйнө менен кошо биз да өзгөрүшүбүз керек. Үйлөрдү куруунун жаңы философиясын — рационалдуу, ыкчам жана үнөмдүү ыкманы калыптандыруу маанилүү", — дейт Шер-Нияз.
