Бишкек шаарына эмнеге метро курганга болбойт?

Бишкек шаарындагы жаңы генпланды талкуулоодо жашоочулардын бири "Ала-Арча" жана "Аламедин" дарыялары аркылуу метрополитен курса кандай болорун сурады. Санкт-Петербургдагы генпланды иштеп чыккан адис Бишкекте метро үчүн жетиштүү жүргүнчү агымы болбосун, ошондуктан бул долбоордун экономикалык жактан натыйжалуу эместигин билдирди. 

План иштеп чыгуучунун айтымында, шаар калкынын саны жана күнүмдүк транспорттук агым, өзгөчө чоң мегаполистер менен салыштырганда, төмөн. Бишкек үчүн метрополитен эң эффективдүү болорун айтууга азырынча негиз жок.

Метро куруу - бул узак мөөнөттүү жана абдан кымбат долбоор. Ал эми трамвай системасын куруу өтө үнөмдүү жана кыска мөөнөттө ишке киргизүүгө болот. Трамвай менен шаардын борборлору, кичи райондору байланышып, шаардык транспорттук көйгөйлөрдү чечүүгө жардам берет. Метро болсо алты-жети жылга созулчу чоң долбоор, ал эми анын экономикалык пайдасы орто жана узак мөөнөттө гана сезилиши мүмкүн.

Адистин билдтиришинче, Бишкек шаарынын борборундагы темир жол менен 120дон ашык ишканалар байланышта жана алар шаар экономикасын колдоп турат. Эгер темир жолду шаардан чыгарып салса, ал ишканаларга түз таасир этип, экономикалык зыян алып келиши мүмкүн. Ошондуктан, темир жолду чыгарып салуунун ордуна, аны жүргүнчү ташууга да пайдаланса болот.

Жалпы алганда, Бишкек үчүн эң маанилүү маселе — учурдагы коомдук транспортту жакшыртуу, анын ичинде автобустарды көбөйтүү, трамвайлар менен жакшыртуу же башка транспорттук инфраструктураларды өркүндөтүү болушу мүмкүн.